“”أحتياجك”””

Share on facebook
Share on twitter
Share on linkedin
Share on pinterest
Share on tumblr
Share on telegram
Share on whatsapp

 

كتبت    //    أماني حسن

تقريباً كده إحنا مش محتاجين حد يحبنا ، إحنا بقينا محتاجين اللى يحس بينا ،اللى يفهمنا فعلاً زي ما احنا ، اللى ما يطلقش علينا أحكام باطلة ،
بقينا محتاجين اللى يصدق ضعفنا وقلقنا وخوفنا من الأيام ،

اللى قادر يحتوينا برغم العيوب اللى جوانا ، يلتمس لشعورنا ألف عذر ،

خلاص بطلنا نصدق حد يقولنا كلام حب ، كرهنا أي انفعال كداب ، رافضين أي شهد وحلاوة لسان …

احنا محتاجين فعلا ” إنسان ” بمعنى كلمة ” إنسان ”

تكون الرحمة أسلوبه و الإحتواء منهجه و الإحساس جيناته الوراثية ..

كم الرعب اللى بقى موجود في النفس البشرية أجبرتنا نتغاضى كتير عن أي تجربة حب معدومة المصداقية ، معدومة الأفعال ….
صدق اللى قال شبعنا كلام لحد ما ارتوينا …

ما بقاش من الصعب فعلا تلاقي اللى يحبك …لكن بقى من الأصعب تلاقي اللى يحس بيك …يخاف عليك بجد ويعمل لزعلك ألف حساب

اللى يثبت لك فعلاً إنك كل همه ؛و شأنك هو شأنه ،و دقيقة غياب منك تساوي عمر بحاله …

انت مش محتاج نسخة منك في الطيبة ولا في الحب ….انت محتاج الروح اللى تجمل الدنيا في عينيك ..الروح اللى تشدك للسعادة

من الآخر : انت محتاج الروح اللى تحس بأدق تفاصيل تعبك في عز ضحكتك العالية و مرحك الكداب وتظاهرك باللآمبالاة …
تقريبا كلنا متفقين إن ألافعال هي اللي بتثبت الحب وأن الإهتمام والمعامله الطيبه والإهتمام بالتفاصيل كلها دليل على الحب ، لكن خلينا برضه نبقي متفقين أننا بنحتاج نسمع كلمات تعبر عن الحب وتلمس مشاعرنا من اللى بنحبهم ، وخلينا برضه نبقي متفقين أن الحب شعور وعاطفة محتاج لإشباع زي الجوع والعطش بالظبط ..

بنحتاج نحس بأهميتنا في حياة الناس اللى بتحبنا ، بنحتاج نسمع منهم أننا أهم حاجه في حياتهم وأجمل حاجه في دنيتهم ، بنحتاج نحس باهمية وجودنا في حياتهم ونشوف ده في تصرفتهم وبرضه نسمعه في كلامهم

الكلمه الحلوه مش كلمه بتتقال وخلاص ، الكلمه الحلوه بتقوي علاقتنا بالناس اللي بنحبهم وبتقرب المسافات بين قلوبنا ..فبلاش تستهون بكلمة حلوة تقولها لشخص بتحبه .. هو بيكون محتاج يسمع كلام حب يطمنه و يحسسه بقيمته في حياتك

” بحبك ، مش بحس براحه غير معاك ، الحمدلله أنك في حياتى ” كلمات بسيطه جدا بس تآثيرها كبير جدا جدا خصوصا لما تكون صادقه ومن القلب

أهتم باللي بتحبهم وقولهم كلام حلو ، أشبع رغبتهم وأحتياجهم للكلام الحلو والمشاعر الجميله ، فرحهم بالمواقف الحلوه والكلام الحلو دلوقتى مش بعدين .. لأنك ممكن يجي عليك وقت تبقي بتتمنى ولو دقيقه واحده تعبرلهم فيها عن احساسك بيهم وحبك ليهم

قد يعجبك أيضًأ

Open chat
1
Scan the code
تواصل معنا