دخلنا حارة سد
كتب.. عيد المصري
زمان من 100 سنه
أهل مصر كانوا بينقلوا أساس العروسة لبيت العريس “العزال أو العفش” علي الجمال فكانوا يحضروا أول جمل ويزينوه بالورد ويحطوا عليه الدهب بتاع العروسة والجمل اللي وراه يحمل الصندوق “الدولاب ” ..وهكذا الي أخر جمل يحمل الوقود للفرن الفلاحي “أقراص الجله ” وتقريباً يا إما جمل صغير “بعرور ” أو أضعف جمل …في أحد المرات كانوا بينقلوا العزال من بلد الي بلد أخري والمعروف عن مصر قديما انها كانت حارات ولها ابواب وكانت الحارات تكون متشابهه احيانا ً فدخلوا حاره غلط والحارات دايما بتكون ضيقه لا تسع الي لحركه جمل واحد …فدخلوا الي نهايه الحاره وجودها سد فعلشان يغيروا خط سيرهم بقي جمل “الجله في الامام وجمل الذهب في الخلف اخر شىء في القافله ..ولذلك طلع علينا المثل الشعبي “هو انت مولود في حاره سد ” بمعني ضيق الأفق في فكره وتصرفاته وتخطيطه اتولد في الحاره السد اللي خلت جمل الذهب بقي ورا وجمل الجله قدام . او ان كل الموازين انقلب.. او خلاص الموضوع انتهى ولازم نرجع تانى من جديد
