بقلم .. امانى حسن
أجمل حاجة ف الحياة إنك تلاقي حد يحبك حب مطلق ، يحبك بدون مقابل يحبك بدون مصلحه ، يحبك لنفسك زي ما هي ، يحبك حب التقبل التام ، يحبك بمميزاتك وبعيوبك ، يحبلك السعادة علطوول ، يحبلك الفرحة دايما ، يحب يشوفك مبسووط ، مش عايز منك حاجة غير انك تكون ف احسن حالاتك ومبسوط ، قلبه بيطمن بوجودك ، قلبه بيحس بالهدووء جنبك ، بيبعد بيك عن صخب الحياة ، حاطك ف كفة والعالم كله ف كفة ، مش عايز من الدنيا غيرك ، داخل ف ادق تفاصيل حياتك ، مش بتحلا الحياة غير بيك ، اذا اختفيت يدور عليك ، اذا بعدت يقرب منك ، اذا زعلت يخاف على زعلك ، اذا اتضايقت يخفف عنك ، اذا احتجتله يكون سندك ، اذا كل الناس تخلت عنك هو لأ ، إذا كل الناس فهمتك غلط هو لأ ، اذا كل الناس بعدت وسابتك هو لأ !!
” الضمان المطلق ”
احلى حاجة لما تكون ضامن الشخص ده ضمان مطلق ، ضامن انه مش هيبعد عنك ، ضامن إنه مش هيزعل منك ، ضامن إنه مش هيفهمك غلط ، ضامن إنه سندك طول الوقت ، ضامن إنه ضهرك علطوول ، عمرك ف لحظة ما تشك ف إنه يسيبك ، عمرك ف لحظة ما تشك إنه بيدور على غيرك ، عمرك ما تشك انه بيخونك ، عمرك ف لحظة ما تفكر إنه ممكن يمشي ، مجرد التفكير أصلا ميجيش ف خيالك ، مجرد انه وحش ميخطرش على بالك.
” الامان المطلق ”
والاجمل من كل حاجة إن الشخص ده يديك الأمان المطلق ، مهما حصل مش خايف تحكيله ، مهما كان مش متردد تشكيله ، بتحكيله عن كل شيء واي شيء من غير خوف ، مش خايف من ردة فعله ، مش خايف يفهمك غلط ، مديك حرية الكلام ، مديك حرية الفضفضة ، عمرك ما خفت وانت بتقله حاجة ، عمرك ما شكيت انه هيزعل منك ، لدرجة إن لو إحساسك بدأ يتغير تجاهه لاي سبب تجري عليه وتترمي ف حضنه وتقوله انا خايف من مشاعري ناحيتك ، انا مش عايز امشي واسيبك ، انا مش عايز ابعد عنك ، انت كل حياتي ، مش عايز احس باي شيء وحش ناحيتك ، انت حبيبي وانا بحبك وهفضل احبك.
“حافظ عليه ”
لو الأنسان ده موجود ف حياتك ، حافظ عليه ، خليك جنبه ، متفهمش خوفه عليك غلط ، متفهمش غيرته عليك غلط ، متفهمش اي حاجة بيعملها غلط ، لإنه اكيد اكيد مش بيكون بيعمل حاجة غير عشان بيحبك ، لو حسيت انه غلط فيك سامحه ، لو حسيت انه زعلان منك صالحه ، لو حسيت انه مضايق منك خفف عنه ، لو حسيت انه محتاجلك اترمي ف حضنه ، عشان الانسان ده مش هيتكرر تاني ف حياتك ، فمتفقدوش مهما حصل ، ممكن تلاقي حد يحبك تاني ، لكن صدقني مش هتلاقي حد يحبك زيه ، ولو مش موجود ادعي ربنا يرزقك بواحد زيه عشان فعلا الحياة بيختلف طعمها مية ف المية لما يكون ف حياتك.
ربنا يرزقكم من يحبكم الحب المطلق ، ويديكم الامان المطلق ، وتضمنوه الضمان المطلق !!
#اماني#حسن#رفاعي
