كتبت  :  سماح حسيب

احنا ديما فى الليالي الجميلة بنحاول نقرب زي ما رب العزة قال في كتابه الكريم ” واسجد واقترب “

علشان كدة الكلام ده مهم لناس كتير

اللي بيتلخبطوا بين التهجد والقيام والتراويح ومش عارفين الفرق بينهم

ركزوا معايا في الكلام دا ♥️

الفرق بين ( صلاة التراويح ،صلاة التهجد .صلاة قيام الليل )

اولا هي كلهم مسميات تطلق على صلاة التطوع من بعد العشاء

بس الفرق كله في توقيت صلاتك

يعني لو صليت بعد العشاء مباشرة من غير ما تناملك حبة = تبقى تراويح
لكن لو صليت العشاء ونمت شوية وصحيت في الثلث الأخير من الليل = يبقى تهجد
والقيام دا مسمى عام معناه = إنك تقوم ليلك أو جزء منه بين يدي ربك حتى من غير صلاة ممكن ذكر وقرآن بس

يعني نصلي انهي واحدة فيهم .. وبأنهي نية ؟

صلي التراويح بعد العشاء
وناملك شوية مثلاً واصحى في الثلث الأخير صليلك ركعتين أو أكتر تهجد
يعني مش هتخسر حاجة لو صليت الاتنين

طب هيّ كام ركعة التراويح ؟

هي على الأرجح ١١ ركعة [ دا السنة وممكن تزود ، المهم تكون عدد زوجي ٨ مثلاً وبعدها ركعتين شفع وركعة وتر فتصبح عددًا فردياً اللي هو ١١ ] .

طيب بنصليهم ازاي ؟
ركعتين ركعتين .. بنصليهم [ مثنى مثنى ] .
و بين كل اتنين ناخد راحة نذكر الله دقيقتين كدا ومنها نستريح [ عشان كدا سموها التراويح ] .

طب ينفع نقرأ فيها من المصحف ؟
اه ينفع نقرأ من المصحف فيها [ لإنها صلاة نافلة مش فرض ] .
طب أنا معنديش حامل للمصحف ؟
ولا يهمك .. ينفع نشيل المصحف بإيدنا [ لو مش متوفر حامل للمصحف ] .

طيب الناس بتصلي بجزء في اليوم بس أنا طاقتي على قدها ومش هقدر .. ينفع أصلي بسور قصيرة ؟

اه ينفع نصليها بقصار السور [ لغير القادر على حمل المصحف أو لغير القادر على قراءة أجزاء كبيرة ] .

طب أنا بصراحة مش هقدر أصلي 11 ركعة
لغير القادر على اتمام الـ ١١ ركعة يصلي ركعتين ..
صلي أي حاجة المهم تصلي ماتبخلش على نفسك بالثواب الكبير ده

تقبل منا ومنكم صالح الاعمال