#الام لما تعدى على امك وانت ساكن برة لأى سبب
لازم تقولك أقعد كُل يا واد
ومهما قلت واتحججت علشان تمشى
تلاقيها بتقولك
“تعدمني” لو ما كلت
والغريب إن ف كل مره ح تلاقي ليك اكل موجود
وجاهز وسخن ولسة فيه ريحة طبيخ زمان حتى لو شوية بصاره
مش بس كدة ، دا لازم تنزل من عندها شايل أى حاجة
شوية فاكهة يمكن
كام كيس سكر إحتمال
كام إزازه زيت برضوا ممكن
كام بيضة وارد
طبق كده ملفوف بجرنال جواه من الخيرات جايز
ومينفعش برضه تقول لأ
واحتمال تكرمش لك ورقة ب ٢٠٠ جنيه ف ايدك
مع جملة المليان يكب ع الفاضى
إديهم للعيال ولادك
وانت ماشى تفضل واقفة فى الشباك
وتدعيلك وتقول
ربنا يكفيك شر ولاد الحرام
لحد ما تغيب عن عنيها
البيت الطيب..
بيت العز والجود والكرم
اللى مهما عشت فى بيوت أحلي وأفخم
يظل البيت اللي فيه أمك افضل بيت..
