عقل للدعايه والاعلان هذا الحب الذي تريده المرأةعقل للدعايه والاعلان

اسيوط

كتب /سيد محمود

هذا الحب الذي تريده المرأة

الناس اصبحت بتحترم الفلوس… مش الأشخاص!
الناس بتدّي للغني احترام بزيادة… وتنظر للفقير من فوق!
حتي النساء؟ حتي النساء أولهم.

أكيد لاحظت؟ الناس لما تشوف حد راكب عربيّة فخمة ولا لابس ماركة… فجأة تبتسم! فجأة هتلاقي الكل بيعامله بإحترام!

لكن نفس الناس… لما يشوفوا واحد شكله على قده، هدومه بسيطة، يمكن محتاج… هتلاقي النظرات اتغيرت تمامًا!
ليه؟ عشان ممعهوش؟ عشان مش “شكله غني”؟!

فصدقني.. أغلب الناس بقوا بيقيسوا القيمة الحقيقة بالفلوس، مش بالقلوب!

فلو لابس ملابس ماركة، راكب عربية غالية، أو بتصرف كتير… فجأة هتلاقي كل العيون بتلمع!

واللي كان بيكلمك بالعافية، هيقولك “حضرتك”، ويا “بشمهندس”، ويا “سعادة البية”

واللي عمرها ما بصّت في وشك، بقت بتضحكلك وتقول:
“بصراحة ذوقك راقي جدًا!”

عارف ليه؟ مش عشان شيء ملفت أكتر من الفلوس.

فالغني؟ بيتحط على كفوف الراحة حتى لو ماعملش حاجة تستاهل فعلاً.

الفقير؟ حتى لو محترم وراجل بمعنى الكلمة…
بيتعامل زي الزيرو، معاملة أقل من العادي.

والأغرب بقى؟ إن الموضوع ده مش عند الرجالة بس، لأ… ده حتى الستات معظمهم القيمة بتظهر في المادة!

هتلاقي كتير من البنات النهاردة أول ما تسمع
إن واحد مرتبه مش كبير أو لسه بيبدأ حياته هتقول:
“أنا مش هضحي بمستقبلي!”

وهي مش واخدة بالها إن ممكن يكون فيه ناس جوهرة نادرة…
بس مش لابس ماسك، ولا عايش تمثيلية فلوس.

والحقيقة اللي بتوجع بجد : الست أول واحدة ممكن تتغير علي جوزها وتقوله : “جيبك خفّ”.

هتقولك : “أنا بدوّر على راحة واستقرار!”،
“مش بدور علي شيل الهمّ”

طب والراجل الغلبان اللي بيكافح وواقف على رجله ده؟
اللي بيحاول يفرّحك من قلبه؟ ده ميستحقش فرصة؟

المشكلة مش في الفلوس…
المشكلة إنك بقيت بتسعّر الإنسان وكأنه سلعة.
بقيت تشوف الناس على قد اللي في جيبهم مش اللي في قلبهم.

يعني هو الغني لما يغلط، تقول: “أكيد مضغوط في شغله”
والفقير لو اتأخر في الرد، تقول: “إيه قلة الذوق دي!”

النبي قال إيه؟

قال ﷺ: “انظروا إلى من هو أسفل منكم، ولا تنظروا إلى من هو فوقكم، فهو أجدر ألا تزدروا نعمة الله عليكم.”

يعني متقارنش نفسك بالغني وتقعد تتحسر، ولا تبص للفقير وتقوله “مش شغلي”!
الحقيقة ربنا بيختبر الكل…
بس اللي بينجح، هو اللي بيشوف القلوب مش الجيوب!

ومين اللي قرر إن احترامك للناس مربوط برصيدهم في البنك؟
وخليني أقولك جملة هتوجعك بس هتفوّقك:

اللي بيحترم الغني عشان غناه، هيقلل من الغلبان مهما كان محترم ومهما كانت أفعاله كويسه. (لمجرد إنه فقير).

وده مش دين، مش عدل، ولا إنسانية.

اللي فاكر إن الغِنى هو القيمة، غالبًا فقير جدًا من جوه.
واللي بيختار يعامل الناس على حسب الفلوس، غالبًا هيشتري الرخيص طالما بيلمَع.

فلو عايز تعرف معدن الناس فعلاً؟
حاول تفلس ودوّقهم مِن ظروفك مرة، وشوف مين من الناس هيفضل حواليك؟ ولو ملقتش حد؟ يبقي دي دايرتك.

وساعتها بس… هتعرف إن الفلوس ممكن تجيب كل حاجة…
إلا “الناس الحقيقية” وهتشتري كل “اللي بيلمع” إلا “الغالي”.