الترند.. بين الوعي والسطحية

بواسطةMohamed

مصر

كتبت    هدوى محمود

بقينا نصحى ونام على الترندات. كل يوم نفتح السوشيال ميديا نلاقي موضوع جديد مسيطر على الكل. ساعات الموضوع بيكون مهم فعلًا قضية عامة أو أزمة بتمس حياتنا
وساعات تانية تلاقي ترند ملوش أي معنى واخد صدارة الصفحات.
اللي ملاحظاه إن الترند بقى زي المراية. هو مش مجرد هاشتاج أو كلمة بتتصدر لكنه بيكشف إحنا بنتحرك إزاي وبنفكر في إيه. ساعات يبان إن في وعي عند الناس وبيستخدموا الترند كأداة ضغط عشان يوصلوا صوتهم، وساعات السطحية بتاخد مكانها وبتخلينا نهمل القضايا اللي تستحق.
الترند مش كله وحش ولا كله كويس
خلينا واقعيين. مش كل ترند تافه ومش كل ترند مفيد مثلاً:
ترند زيادة أسعار
السلع: لما الأسعار زادت بشكل ملحوظ، السوشيال ميديا اتحولت لساحة نقاش وضغط الناس كانت بتنقل معاناتها يوم بيوم. الترند هنا لعب دور حقيقي خلى صوت الناس يوصل، حتى لو مفيش حلول سريعة.
ترند الطفل المريض اللي كان محتاج علاج بالخارج: الكل اتكلم عنه، واتحول الترند لحملة إنسانية خلت القضية توصل للمسؤولين وده نموذج للوعي الجمعي
في المقابل:
ترند فيديو ساخر أو مشهد كوميدي من برنامج أو مسلسل بنلاقيه واخد مساحة ضخمة جدًا، والناس بتتكلم عنه بالساعات في حين إن في قضايا أهم ممكن تكون اتدفنت تحت الترند ده.
ترند الخناقات بين المشاهير: ممكن تلاقي جدال سخيف بين اتنين فنانين أو مشاهير وفجأة الناس كلها بتسيب كل حاجة وتركز في الموضوع وكأنه مصيري.
ليه بننجذب أكتر للسطحي؟
الحقيقة إن الحاجات الخفيفة بتنتشر أسرع. الناس بتحب تضحك وتنسى الهم فطبيعي فيديو ساخر أو كلمة لاذعة تبقى لايك وشير أسرع من مقال طويل أو قضية تقيلة. بس السؤال هنا: هل لازم ده يفضل الطبيعي؟ ولا محتاجين ندي مساحة أكبر للترندات اللي فيها قيمة ومعنى؟
إحنا أصحاب القرار
الترند مش حاجة بتيجي من السماء إحنا اللي بنصنعه. كل مشاركة، كل تعليق، كل إعجاب هو اللي بيرفع الموضوع لفوق يعني لو اخترنا ندعم القضايا المهمة ونسيب التفاهة على جنب، هنوصل رسالة إن الناس مشغولة بالجد. ولو فضلنا ندي حجم أكبر للسطحية، يبقى إحنا اللي بنساهم إن السوشيال ميديا تبقى فوضى.
الترند مش عدو ولا صديق هو انعكاس لينا ساعات بيعكس وعينا وقوتنا كناس قادرة تأثر وتغير وساعات بيكشف سطحيتنا وضيع وقتنا. وفي الآخر الاختيار في إيدنا هل عايزين نستخدمه كوسيلة للوعي والتغيير؟ ولا نخليه مجرد موجة ضحك وسخرية تختفي بعد ساعات؟

موضوعات ذات صلة