الخبر ده مايعديش .. برغم الاحداث والقمة الدولية

كتبت   //  نورا زين

كرم جابر .. عارفينه طبعا ..
ذهبية اولمبياد اثينا ٢٠٠٤ .. وفضية لندن ٢٠١٢ .. وميداليات بطولات عالم والعاب متوسط ماتعدش ف المصارعة الروماني وزن ٩٦ كجم ..
كرم اعتزل اللعب ف ٢٠١٦ .. وركن تماما وفكر يتجه للتمثيل ويشتغل اعمال حرة وبقاله ٧ سنين على كده ..
فكر يرجع للبساط .. عمل معسكر لمدة شهر واحد .. ودخل بطولة العالم للرواد في المصارعة ..

كرم جابر المصارع المصري الاسطوري .. في سن ٤٤ سنة .. جاب ذهبية البطولة .. لأ وايه .. دشمل الابطال الاربعة اللي لاعبهم .. ابطال عالم مش لعيبة عادية .. ٤ ماتشات خلصوا عدم تكافؤ .. يا ٨/صفر يا ٩/صفر .. مفيش الا الواد التركي خد نقطتين قبل ما يتدشمل زي اخواته ..

دي مصر .. الچينات اللي مليانة قوة وارادة وتحدي .. اللي محدش يتحداها ولا يقف ف وشها لو قررت تحط عالعالم كله ..

جدع يا بطل .. ربنا معاك .. ومعانا .. عاش يا كرم .. وتحيا مصر 🇪🇬