قلة الصحاب.. لما الغدر ييجي من أقرب مسافة
مش دايما قلة الصحاب خسارة أحيانا بتكون نعمة مقنعة.
لأن أكتر الوجع مش بييجي من الغريب، بييجي من شخص كنت فاكراه ضهر، وسند، وأمان.
في زمن بقت فيه العلاقات سريعة والمصالح هي الأساس بقينا نشوف نوع جديد من الصحبة
صحبة عند اللزوم عند الضحك عند المصلحة
لكن وقت الجد؟
تختفي.
الغدر مش شرط ييجي في صورة خيانة واضحة
أحيانا ييجي في سكوت
في وقت محتاجة فيه كلمة
أو غيرة مستخبية في ابتسامة
أو شماتة متغلفة بنصيحة
الغيرة بقت مرض مش قليل
ناس تزعل لفرحك
وتضايق لنجاحك
وتراقبك مش علشان تطمن عليك
لكن علشان تشوف هتوقعي إمتى
وقلة الصحاب هنا مش معناها الوحدة
لكن معناها إن اللي فاضوا… نضيفين
ناس وجودهم حقيقي
وكلامهم صادق
وقلوبهم مش مليانة حقد
يمكن نكبر وندرك إن الصحبة مش عدد
الصحبة موقف
مش عشرة سنين
لكن عشرة وقت
وفي الآخر
اللي خان وغدر وغيره
كشف نفسه بنفسه
وساب مكانه لناس تستاهل
قلة الصحاب مش أزمة
الأزمة الحقيقية إنك تكمّلي مع ناس
مش شبه قلبك
