مصر   اسيوط

بقلم       معتز حمدي

وهاتلي رغيف وحبة ملح
وحد يكون جدع بيصوون
بلاش مِنُه اللي يجرحنا
ف أقرب فرصه لينا يخون
ياعيني عليكِ ياعِشره
يعوض ربنا ف الناس
كتير الفلصو والقِشره
قليل الأصل والإحساس
نضيف القلب ضاع بينا
في دُنيتنا دي ليه وانداس
هاتلي رغيف وحبة ملح
وناس على بعضها بتخاف
يحبوا الخير لبعضيهُم
لُطاف مع بعضُهُم وخفاف
ما هُماش بالسواد شايلين
ولا عايشينها خلف خلاف
هاتلي رغيف وحبة ملح
وحد يقولي أيه مالك
يطبطب ع الوجع بايديه
يقولي عليه صلاح حالك
يطمني في وسط الخوف
ويجبر خاطري بكلامُه
يعين قلبي على الأيام
وعلى حِملُه والآمُه
ويرمي الوحشه ورا ضهره
يحُط الحلوه قُدامُه
هاتلي رغيف وحبة ملح
نفوس صافيه وقلوب سالكه
تعبت كتير ف عشرة ناس
لا ليها ضمير ولا مالكه
عُيونهم تقصف الأعمار
قُلوبهم بالسوااد حالكَه
هاتلي رغيف وحبة ملح
قلوب لو غِبت تقلق موت
عليا تفوت وتطمن ولا تنساش
ولو مالت حيطان الدنيا حواليا
ولو روحي ضاقِت بيا
آلاقي ف حُضنهُم تِرحااب
وفتحة باب
وضمه تحِن ما تقساش
هاتلي رغيف وحبة ملح
وشارع شعره متحني دفا وآمان
على الحلوه وعلى المُره
تشوف أجدعها ناس وجيران
ما يشغلهاش دا مطرح مين
ولا تفرق معاها بيباان
هاتلي رغيف وحبة ملح
شهامة أهلنا الجدعان
هاتلي رغيف وحبة ملح
وهاتلي اخوات ف بيت عيله
وطبليه على ١٠٠ إيد
ولمه تحت ضُليله
بقينا إزاي كده أغراااب
وقطمت ضهرنا الشيله
هاتلي رغيف وحبة ملح
وضحكه هاجره ملامحنا
وراحة بال تهنينا
تطمنها مطارحنا
وهاتلي وهات ولا تنساش
من الأيام تجيبنا احنا
من الأيام تجيبنا احنا
هاتلي رغيف وحبة ملح
وناس فارقت حياتنا عُزاز
مكانهُم لسه متعور بينزِف دمع
حنانهُم عُمره ما اتعوض
وشوقنا وحش ما اتروض
ساعات للسيره نتعرَّض
بنلقى عيونا تلمع لمع
هاتلي رغيف وحبة ملح
هديااان سر ف بيوتنا
مشاكلنا بهدوووء تتحل
ولا يسمع غريب صووتنا
وصبر وستر بزياااده
ورزق وبركه في قوتنا
هاتلي رغيف وحبة ملح
ووياهم شوية بخت
تعبت ياصاحبي ع الاخِر
وف الدُنيادي فعلاً دُخت
لقتني لسه في مكااني
وبدري العمر لكن شِخت
هاتلي رغيف وحبة ملح
شوية ورد ف السِكه
وطاقة نووور
شوية فرح لو فكه
يعدووا السوور
كفايه العُمر راح مني
وانا مكسووور
هاتلي رغيف وحبة ملح
ولحظة حُب منسيه
وفنجان شاي ونظرة عين
واغنيه رومانسيه
وسهرايه قلوب دافيه
بود معاه صفى نيه
هاتلي رغيف وحبة ملح
وحد يكون جدع بيصوون
بلاش منه اللي يجرحنا
ف أقرب فرصه لينا يخون
ياعيني عليكِ ياعشره
يعوض ربنا ف الناس
نضيف القلب تاه بينا
ف دُنيتنا دي ليه وانداس
غيوره✍️