موضوع غرق الطيارة الأمريكية في البحر الأحمر ده لسه عامل قلق حبتين

كتب…..محمد صلاح

المهم بقى إن في تصريحات طلعت على لسان مسئولين أمريكيين بتقول إن التقارير الأولية بتقول إن الطيارة وقعت في البحر علشان حاملة الطائرات كانت بتحاول تهرب من هجوم الحوثيين وده اللي خلى السواق يعمل غرزة غشيمة حبتين.. والطيارة ساعتها مكنتش في مكنها الصح علشان كده وقعت.. تقريبا مكنتش مربوطة كويس

التصريحات دي بتأكد اللي أعلنته جماعة الحوثيين إنها استهدفت حاملة الطائرات بطائرات مسيرة وصواريخ.

وفي نفس الوقت بتكدب رواية البحرية الأمريكية اللي قالت إن الطيارة وقعت وهي بتركن في مكانها الطبيعي

الفكرة بقى إن في فيديو منتشر بشكل كبير جدا علي تويتر .. جايب حاملة الطائرات وهي فعلا بتتحرك بشكل سريع جدا لدرجة إنك تحسها هتتقلب..

وده اللي خلى في نفس الوقت صور للأقمار الصناعية تتكلم عن حركة حاملة الطائرات المفاجأة واللي ظهرت بشكل غريب

في ناس كتير جدا بتتكلم عن الجدوى من وجود القطع العسكرية الأمريكية في البحر الأحمر وهي لسه لحد دلوقتي محققتش الهدف المعلن بتاع ترامب وهو استعاده الأمن والاستقرار في البحر الأحمر والقضاء على الحوثيين وكمان تأمين التجارة

وده خلى محللين عسكريين يتكلموا على إن اللي بيحصل في البحر الأحمر وأخرهم غرق الطيارة ده بيين قد أيه في تفوق للحوثيين علي القوات الأمريكية في البحر الأحمر خاصة وإن حاملة الطائرات دي بيكون معاها قطع عسكرية تاني علشان تأمنها وكمان عليها أكتر من طيارة تقدر تتعامل مع الهجوم وفيها وسائل دفاعية كتيره.

وده بيرجعنا لرد سياده الريس علي ترامب لما طلب منه تسهيلات لتحركات السفن الامريكيه من قناه السويس وقاله ان ده من شأنه حمايه البحر الاحمر من الحوثيين فرد عليه سياده الريس وقاله ان الحرب مع الحوثيين ليس مشكلتها تحركات السفن من قناه السويس وستنتهي بمجرد انتهاء حرب غزه