كتبت  هدول محمود

حين تصبح القلوب أثقل من الجبال

الدنيا بقت صعبة أوي وكل يوم بنكتشف إن مفيش حاجة بتفضل على حالها. ناس كانت قريبة بقت بعيدة وقلوب كانت مليانة حنية بقت ناشفة كأنها عمرها ما حبت.
يمكن هي الدنيا كده تمتحننا طول الوقت تحطنا في مواقف تغيرنا غصب عننا وتخلينا نلبس وشوش مالهاش علاقة بينا.
في لحظات بتبقي حاسة إنك تعبت من كتر الصدمات ومش قادرة حتى تفتحي قلبك لحد لأنك بقيت خايفة من الوجع. بتضحكي وسط الناس عادي بس جواكي في صوت بيصرخ من كتر التعب.
بس مهما حصل بنفضل نحاول نكون بخير نحاول نحافظ على الجزء الطيب اللي جوانا قبل ما الدنيا تاكله مننا.
اللي بيعدي فينا مش سهل بس بيخلينا نفهم. نفهم إن مش كل الناس زينا وإن الطيبة مش ضعف وإن ربنا بيشوف وبيعوض. يمكن التأخير مش نسيان يمكن الوجع مش نهاية يمكن دي الطريقة اللي ربنا بيقوينا بيها.
الدنيا قاسية آه بس لسه فيها لحظات حلوة بتخلينا نكمل كلمة بتريحنا حضن بيرجعنا لنفسنا دعوة بتطلع من قلب محب تداوي اللي جوانا.
وكل مرة بنتكسر فيها بنقوم من جديد يمكن أهدى يمكن أنضج بس أكيد أقوى.
وفي الآخر بنتعلم إن مفيش وجع بيستمر وإن بعد كل ضلمة في نور وبعد كل وجع في فرج من ربنا بس محتاجين نصبر ونصدق إن الخير جاي حتى لو اتأخر