مصر     اسيوط

كتب      معتز حمدي

الصورة ف مرايتي مهيش ليا
ولا نفس ملامحي ولا هي
انا عامل زي مااكون صخرة
والعمر دا عامل تعرية!
…..
انا كنت شباب وبقيت شايب
الوش حليب وصبح رايب
وكأن زماني طلق رمحه
وف قلب شبابي وراح صايب!
….
مش هو الشخص اللي انا عارفه
ولا مصدر شكلي ولا صرفه
الشِعر عيوبه بتتاخد
من عيب مضمونه وعيب حرفه!
…….
انا نافر جدا م الصورة
من سهل وباين فزورة
انا شايف نفسي من التالتة
مع ان انا قاعد مقصورة!
….
فين راحت صورتي الوردية
وانا طفل وباخد ف عيدية
وانا بجري صاروخ تحت المطرة
مع اي عواصف رعدية!
…..
يامرايتي اتوصي بهندامك
دانا اجمل واحد قدامك
انا حد لطيف كله براءة
مش مجرم واخد اعدامك!
…..
يامراية ماتهدي وتتلمي
ايه راح يرضيكي ان زاد همي؟
هو انتي مزاجك اني احزن
ويكون على ايدك فار دمي!
…….
ايه يعني جاوزت الخمسين؟!
منا لسه مؤدب ورزين
ومشاعري البكر ماكبرتشي
ولا بزعل ابدا وحزين!
…..
وخطوط العمر مهيش واضحة
وكمان تجاعيدي مهيش فاضحة
واذا كان يرضيكي ان انا اخسر
ماتجيبي خساير مش فادحة!

✍🏻